当前位置 : 主页 > V城生活 >【轮证赢家】等埋位

【轮证赢家】等埋位

阅读610
【轮证赢家】等埋位放大图片

上个星期五(10月18日)恒指下行点数虽然唔係多,但拆5分钟图时就见到DMI嘅ADX喺恒指下行时上升,换言之暗示上个星期五恒指都几有力下行,所以Day trade牛策略要即时斩缆。

放完两日假返嚟之后,今朝早恒指开市微跌4点,做26715点;依家9点47分,同事陆陆续续返到公司,见恒指一度跌深过少少,不过都係几十点嘅事,至依家已经回升啦,升39点,做26759点。

虽然恒指暂见升势,不过喺日线图上见恒指喺上个星期四同五恒指粒烛已经顶住咗条保历加通道顶,同步下方见SlowSTC(14,3)两线已经喺严重超买水平相遇,兼已经出现掉头下行嘅迹象。再留心埋条DMI嘅ADX,由上个星期四报19.09,至依家升至19.29,但对比返呢三日,恒指呈慢跌嘅步伐,换言之呢三日(暂时计埋今日)嘅暗跌,ADX暗示係一种有力量嘅暗跌,睇嚟都唔可以轻视。

再睇埋恒指牛熊证街货图,上方熊证最贴价为26900至26999点,呢度有相当于141张期指;重货区就喺第三层,即27100至27199点,有相当于871张期指。至于下方牛证最贴价层上到去26300至26399点,有相当于575张期指;至于重货区就要数到落去25200至25299点,不过呢度都只有668张期指啫,估计係之前恒指下行时有一堆资金入咗呢个位,积埋变成重货,但到今日都仲未散水啫,但目相信随住恒指点数有所改变,呢堆收回价嘅牛证槓桿亦都有唔同,係以「刀仔锯大树」原则为大前题下,相信资金会追求更高槓桿嘅牛证,从而令重货区慢慢上移至近现价嘅水平。见26000至26099点呢度有相当于646张期指,可能就会係下一个重货区。

依家9点58分,恒指做紧26720点,「十字星」出现,不过时间尚早,单凭呢粒唔算属于高位嘅「十字星」唔可以判断到啲乜,话唔定两分钟之后就唔见咗。计一计牛熊街货中间位(26900+26399)/2=26649.5点,呢口价同现价计叫做高于70点嘅水平,虽然係近熊证多啲,但係用两边最贴价街货一比之下,确实係下方牛证多过上方熊证,再配合埋技术分析,下行嘅机会相对高啲,只不过睇个市好似仲想储多啲货咁,还是佢係想比个机会上方熊证都储多啲货,再嚟个左一把、右一把呢?

导演都未叫埋位,霞姨又点会派饭盒呢?都係等叫「Action」啦!

作者阿珊,任财经/投资版传媒人十几年,《钟摆战略赢港股》作者。用技术分析专心玩轮证,唔贪心,志在搵餐下午茶。

电邮:【轮证赢家】等埋位[email protected];FB:轮证赢家

放大图片

上一篇: 下一篇: